گزشتہ دنوں آرمی چیف جنرل سید عاصم منیر نے مظفرآباد کا دورہ کیا۔ انہوں نے یادگار شہدا پر پھولوں کی چادر چڑھائی اور شہدا کی بے مثال قربانیوں کو شاندار خراج عقیدت پیش کیا۔
کشمیر کے شہدا کو خراج عقیدت پیش کرتے ہوئے انہوں نے کشمیر میں چیلنجنگ آپریشنل حالات کے مقابلے کے لیے تعینات افسروں اور سپاہیوں کی غیر متزلزل لگن، پیشہ ورانہ مہارت اور جنگی تیاری کی بھی تعریف کی۔ آرمی چیف نے اس بات کا اعادہ کیا کہ کسی بھی جارحیت کا منہ توڑ جواب دیا جائے گا  انہوں نے پورے عزم کے ساتھ ملک کی خودمختاری اور علاقائی سا لمیت کے دفاع کے لیے پاک فوج کے عزم کا اظہارکیا ۔

 آرمی چیف نے کہا کہ بھارتی مظالم اور بڑھتی ہوئی ہندوتوا انتہا پسندی کشمیریوں کے حق خود ارادیت کی جدوجہد کے عزم کو مضبوط کرتی ہے۔ انہوں نے اس بات کا اعادہ کیا کہ پاکستان ریاستی سرپرستی میں ہونے والے جبر کے خلاف ان کے منصفانہ اور جائز مقصد میں ہمیشہ کشمیریوں کے ساتھ کھڑا رہے گا۔ انہوں نے کہا کہ  بلا شبہ کشمیر ایک دن آزاد ہوگا اور کشمیری عوام کی آزادی اور تقدیر کے مطابق پاکستان کا حصہ ہوگا۔
قبل ازیں آرمی چیف کی آمد پر کور کمانڈر راولپنڈی نے اُن کا استقبال کیا۔