گزشتہ دنوں ملٹری کالج سوئی کا 10واں سالانہ یوم والدین  بڑے جوش و خروش کے ساتھ منایا گیا۔ اس تقریب میں والدین، سول اور فوجی معززین اور مقامی قبائلی عمائدین کو مدعو کیا گیا۔اس موقع پر کمانڈنٹ ایم سی ایس بی بریگیڈیئر عامر اعجاز نے مہمان خصوصی وزیراعلیٰ بلوچستان سرفراز بگٹی سمیت دیگر معزز مہمانوں کا پرتپاک استقبال کیا۔
اپنے خطاب میں وزیر اعلیٰ سرفراز بگٹی نے بلوچستان کے نوجوانوں کو بااختیار بنانے کے لیے ملٹری کالج سوئی اور پاک فوج کے غیر متزلزل عزم کو سراہا۔ انہوں نے کالج کو امید کی کرن قرار دیااور کہاکہ ادارہ خطے میں تعلیم، مساوات اور ترقی کو فروغ دینے میں اہم کردار ادا کر رہا ہے۔

اس موقع پر کیڈٹس نے ایک مربوط مارچ پاسٹ پیش کیا، جس میں نظم و ضبط کا مظاہرہ کیا گیااور حاضرین کی جانب سے زبردست تالیاں بجا کر حوصلہ افزائی کی گئی۔ اس کے بعد پی ٹی، جمناسٹکس اور کراٹے پرفارمنس شو کا برقی کارکردگی کا مظاہرہ  بھی کیا گیا۔
بریگیڈیئر عامر اعجاز نے کالج کی سالانہ رپورٹ پیش کی ۔انہوں نے مقامی نوجوانوں کی صلاحیتوں کو پروان چڑھانے اور انہیں کامیابی کے لیے پلیٹ فارم فراہم کرنے کے لیے کالج کی غیر متزلزل لگن پر زور دیا۔  تقریب میں مہمان خصوصی وزیراعلیٰ  بلوچستان سرفراز بگٹی نے مختلف شعبوں میں نمایاں کارکردگی کا مظاہرہ کرنے والے کیڈٹس کو اعزازات سے نوازا۔