گزشتہ دنوں چیف آف آرمی سٹاف جنرل سید عاصم منیر نے سعودی عرب کا سرکاری دورہ کیا ۔ اس دورے کے دوران آرمی چیف نے ولی عہد اور وزیراعظم محمد بن سلمان سے ملاقات کی جنہوں نے جنرل عاصم منیر کا شاہی محل پہنچنے پر پرتپاک استقبال کیا۔دونوں معززین نے علاقائی امن، دفاعی ،سکیورٹی تعاون اور دوطرفہ تعلقات کو بڑھانے کے لیے حکمت عملی سمیت باہمی دلچسپی کے متعدد امور پر جامع بات چیت کی۔ آرمی چیف نے پاکستان کے لیے ان کی مستقل حمایت پر شکریہ ادا کیا اور خطے میں امن و استحکام کو فروغ دینے میں ان کے اہم کردار کا اعتراف بھی کیا۔

آرمی چیف نے سعودی وزیر دفاع شہزادہ خالد بن سلمان سے بھی الگ ملاقات کی۔ معززین نے دفاع اور سلامتی کے شعبے میں تعاون کو مزید مضبوط بنانے کے عزم کا اظہار کیا۔انہوں نے انجینئر طلال عبداللہ العتیبی، معاون وزیر دفاع رائل سعودی آرمڈ فورسز کے چیف آف جنرل سٹاف ایئر چیف مارشل فیاض بن حمید بن رقیب الرویلی اور رائل سعودی لینڈ فورسز کے چیف لیفٹیننٹ جنرل فہد بن سعود الجوانی سے بھی ملاقات کی ۔