گزشتہ دنوں وزارت دفاع عراق کے جنرل سیکرٹری لیفٹیننٹ جنرل احمد داد سلمان کی قیادت میں ایک اعلیٰ سطحی عراقی وفد نے پاک فضائیہ کے سربراہ ایئر چیف مارشل ظہیر احمد بابر سدھو سے ملاقات کی۔ ملاقات میں باہمی دلچسپی کے کئی اہم شعبوں پر خصوصی توجہ دی گئی جس میں دو طرفہ تربیت اور دونوں ممالک کے درمیان خاص طور پر ہوابازی کے شعبے میں وسیع تعاون کی تلاش پر توجہ دی گئی۔ملاقات کے دوران، ائیر چیف نے پی اے ایف کی جدید کاری کی حکمت عملی کا خاکہ پیش کیا جس میں اتحادی ممالک سے تکنیکی آلات کی خریداری، اہم انفراسٹرکچر کی اپ گریڈیشن، تربیت کی تنظیم نو اور عصری فضائی جنگ کے چیلنجوں سے نمٹنے کی کوششیں شامل ہیں۔ انہوں نے عراقی فضائیہ کے انسانی وسائل، دیکھ بھال کے پیرامیٹرز اور آپریشنل ٹریننگ کی اپ گریڈیشن میں صلاحیت بڑھانے میں مدد فراہم کرنے کا اعادہ کیا۔ JF-17 تھنڈر لڑاکا طیاروں کے ساتھ ساتھ اضافی 12 سپر مشاق ٹرینر طیاروں کے حصول میں بھرپور دلچسپی کا اظہار کیا جس کے ساتھ ساتھ پی اے ایف کی جانب سے بحالی اور لائف سائیکل سپورٹ کے ساتھ تعاون میں اضافے کی صلاحیت پر زور دیا۔

قبل ازیں عراقی وفد نے نیشنل ایرو اسپیس سائنس اینڈ ٹیکنالوجی پارک کا دورہ کیا جہاں وفد کو پاک فضائیہ کے جدید منصوبوں اور تکنیکی اقدامات کے بارے میں بریفنگ دی گئی۔ جنرل سیکرٹری، وزارت دفاع عراق نے نیشنل ایرو اسپیس سائنس اینڈ ٹیکنالوجی پارک میں ہونے والی تحقیق اور ترقی پر تعریف کا اظہار کیا، جو اسے جدت اور تکنیکی ترقی کا مرکز بناتا ہے۔ عراقی وفد کا دورہ پاکستان دونوں ممالک کی جانب سے اپنی متعلقہ فضائی افواج کے درمیان تعاون کو بڑھانے اور مضبوط تعلقات کو فروغ دینیکے ذریعے اپنی موجودہ شراکت داری کو مزید تقویت دینے کے پختہ عزم کی علامت ہے۔